藍芝士黑麥方包

天寒地凍 , 落雨濕濕 , 戶外活動要暫停 ,

不過室內活動一樣可以繼續 !

 

喺屋企一樣可以好開心 ,

煲下劇 , 上上網 , 搓下包包 ,

談何容易又一日 , 自得其樂亦不賴 , 人生就是這樣 !

 

 

< 藍芝士黑麥方包 >

 

近期喜歡加入藍芝士製作鹹麵包 ,

有人唔太喜歡佢氣味強烈 ,

而我就唔多介意 , 反而仲越黎越鍾愛 !

 

大大包黑麥粉快將到期 , 係時候要快快消滅 ,

加入藍芝士 , 酸忌廉簡單做上方包 ,

未出爐已聞到陣陣藍芝士香氣 ,

唔愛藍芝士嘅鄰居可能會覺得難頂 ,

我就覺得好香嘞 , 希望不至令人倒胃 !

 

混醬日本蕃薯炆雞翼

冬日至愛食材之一 .....

~ 蕃薯 ~

愛佢可口 , 愛佢飽肚 , 愛佢甜美 , 愛佢暖胃 ,

種種種種 .........

 

 

< 混醬日本蕃薯炆雞翼 >

 

由其日本蕃薯更愛 , 比本地蕃薯更甜美 ,

今餐隨意混醬 ,

做上自家喜愛菜式 !

 

 

 

日式咖喱牛筋腩

原來有成半個月冇更新網誌 , 

依排唔係忙 , 亦唔係冇煮嘢食 ,

只係懶根太深又貪玩 , 提唔起勁啫 !

 

 

< 日式咖喱牛筋腩 >

 

天氣一日凍過一日 ,

我就最鍾意依啲天氣食辣嘢 , 越辣我就越喜歡 ,

可惜我家少爺唔太食得辣 ,

只好退而求其次 , 選用唔辣嘅日式咖喱炆牛腩 ,

帶甜嘅日式咖喱此終唔係我杯茶 , 我另外加咗碟辣油 ,

不過啲汁都幾香咖喱味 !

  

牛油果烤雞墨西哥卷

好多時為咗等少爺歸家一起開餐 ,

往往晚餐變成宵夜 , 正因為依個原因 ,

晚餐變得越黎越簡單不過 , 昨晚亦唔例外 !

 

 

< 牛油果烤雞墨西哥卷  >

 

喜歡墨西哥薄餅 , 貪佢方便 , 鍾意佢卷咩材料都得 ,

預先焗好雞扒 , 加牛油果 , 蕃茄 , 生菜 , 唧少許沙律醬 ,

話咁易就完成我同少爺嘅晚餐 !

鮮茄青口薯仔粉

我家附近一帶食店已經買少見少 ,

好多時自己一個人食飯都係食燒臘飯 ,

又或者煮個即食麵草草了事算數 ,

有時食得太多難免有啲厭 ,

都係時候要同自己轉轉餐單 !

 

 

< 鮮茄青口薯仔粉 >

 

既然糧倉有整存貨 ,

就等我動動手為自己晚餐增添一份色彩 !

 

其實用嘅材料非常簡單 ,

現成薯仔粉 , 蕃茄 , 玉豆 , 青口 , 洋蔥 , 少許芫荽 , 簡單嘅調味料 ,

出黎效果已令我樂上好一陣子 !

 

經常聽到某啲廚師講 ,

一餐飯要令人食得開懷 , 食材嘅取決 , 食物顏色配襯係好重要 ,

我當然唔係專業廚師 , 亦冇專業水準 ,

不過見到依碟繽紛嘅薯仔粉 , 我未食已經感覺開心晒 !

 

 

 

 

 

韓國麵醬蘿蔔雞煲

天氣越涼冬天嘅食材就越黎越多 ,

每次逛街市都好想買晒返屋企 ,

無奈雪櫃空間有限 , 只好忍下手啦 ! 

 

 

< 韓國麵醬蘿蔔雞煲 >

 

涼涼哋嘅天氣又係煲仔菜出埸時候 ,

依排白蘿蔔已經啱晒時候 , 條條肥嘟嘟 , 而且非常甜美 ,

今餐用佢做煲仔菜 , 利用韓國麵醬作調味 ,

蘿蔔吸晒啲汁 , 好食到呢 ~~

隻雞都要靠邊站呀 ! 

 

京蔥南瓜煙肉卷

難得少爺歸家食飯 , 我當然樂意煮煮煮 ........

 

根據菜檔亞姐報料 , 每年大約八至十月係南瓜最當造期 ,

每年我都會係依個時間盡情買 , 盡情食 , 滿足自己口慾 ,

可惜我家少爺唔太愛 ,

除咗煲湯 , 做甜品以外 , 差不多所有煮法都被拒絕 ,

要佢食多幾件就要玩下花臣先有望 ! 

 

 

< 京蔥南瓜煙肉卷 >

 

依個煮法過往整過 , 幾得少爺歡心 , 願意多食幾件 , 就照舊再煮一次好了 !

 

做法相當簡單 , 用煙肉卷起已處理好嘅南瓜 , 京蔥 ,

用200度焗爐 , 焗20分鐘 ,

再掃燒汁係煙肉表面 , 稍稍再焗一陣就食得 , 連油鑊都唔駛開 ! 

羅漢果霸王花煲豬骨

踏入深秋 , 天氣一天比一天涼快 ,

早晚什至感覺有寒意 , 而且非常乾燥 !

 

我家飯可以唔煮 , 不過湯水絕不能缺 !

 

 

< 羅漢果霸王花煲豬骨 >

 

無論咩季節 , 我家湯水永遠充足 ,

秋冬天出現得最多嘅一種湯料 ~~ 霸王花 ,

貪佢夠清潤 , 而且無需花太多功夫 !

 

少爺近期做鬼兼職 , 經常要用喉嚨發聲扮鬼叫 ,

所以今次加入羅漢果同煲 , 目的想更滋潤 ,

我覺得秋冬天飲依個湯相當唔錯 !

 

 

 

乳酪菠蘿罌粟子磅蛋糕

話咁快又到星期五 ,

秋高氣爽嘅天氣 , 係就係乾燥咗啲 , 不過都好舒服喎 ,

唔出去郊遊一番實在有啲可惜 !

 

所以金魚一早已經相約好友 , 明天出發去行山 ,

有一段極長時間冇運動 , 唔知自己仲行得幾遠呢 ,

希望唔駛俾人抬落山啦 ~~ 嘻嘻 !!

 

 

< 乳酪菠蘿罌粟子磅蛋糕 >

 

無所事事嘅日子 , 最佳娛樂就係走入廚房攪攪震 ,

既可自娛又有得食 , 何樂而不為 !

 

昨晚無聊之下做咗依個蛋糕 ,

用咗快將到期嘅乳酪 , 全屋緊有一罐嘅菠蘿 , 整色整水嘅罌粟子 ,

加加埋埋又有蛋糕食嘞 , 味道唔差o架 !

 

愛爾蘭全麥梳打麵包

少爺依舊忙碌 , 煮飯次數相對減少 ,

多出嘅時間正好俾我摷下書架 , 慢慢研究下烹飪書籍 !

 

唔駛煮飯嘅日子 ,

做得最多就係麵包 , 睇嘅書籍亦同麵包相關 !

 

喜歡就係喜歡 ,

愛麵包多變 , 愛麵包香氣 , 愛手作麵包好玩 ........ 

要數理由實在太多 , 總之就係喜愛 !

 

個人一直較偏向歐陸麵包 , 由其無內餡嘅鹹麵包 ,

鹹鹹香 , 外脆內軟 , 質感煙韌 , 越咬越好味 ,

可惜少爺唔多喜歡 , 佢較喜愛港式麵包 !

 

 

< 愛爾蘭全麥梳打麵包 >

 

睇烹飪書中途俾我發現到佢 ,

材料簡單 , 製作容易 , 連發酵時間都可省卻 , 決定一試 !

 

油 , 糖全部慳番 , 用少量梳打粉取代酵母 , 屬於硬麵包類 ,

因為冇酵母成份 , 質感較為粗糙 , 正正係依款麵包嘅特色 ,

外表依然脆脆 , 亦有煙韌口感 ,

雖然質地稍遜唔多討好 , 不過味道絕對不乃 ,

我會再次俾機會佢出現在我家 !

 

 

 

魚湯花蜆魚肚浸聖瓜

涼意漸濃 , 稍一不慎就會著涼 ,

金魚就係稍為鬆懈中咗招 , 整整病上幾天 ,

病菌實在太利害 , 攪到喉嚨發炎腫脹 ,

腫脹引至耳仔受阻隔 , 左邊耳仔短暫失去聽覺 ,

經過藥物治療消炎 , 已經差不多好番晒 , 袛剩頑咳未清 !

大家真係要好好保重身體 !! 

 

 

< 魚湯花蜆魚肚浸聖瓜 >

 

少爺依排好忙碌 , 既要返學又要做兼職鬼 , 廚房已經休息多天 !

難得少爺昨晚有時間歸家食飯 ,  就煮餐像樣嘅晚飯慰勞下少爺 !

 

少爺最愛貝殼類海產 ,

見街市有花蜆賣 , 反正未試過依隻蜆 , 就買少少試下 ,

隨意加上魚肚 , 聖瓜 , 用上少許魚湯一齊煮 ,

就連鹽都不需多落 , 味道已經相當唔錯 !

 

尋人 : 一位叫亞 Boo 嘅腦友仔 , 你要求我給你食譜已準備好 , 

可惜你留嘅郵址錯誤 , 我寄唔到俾你 , 

你睇到的話就從新給我郵址 , 否則我都幫你唔到囉 !  

 

香濃朱古力小蛋糕

送走老闆 , 生活回復正常 ,

不過就到朋友仔唔多得閒 , 一個二個都話依期好忙碌 , 冇時間出去玩 ,

冇晒玩伴 , 只好留在家中自家娛樂 !

 

 

< 香濃朱古力小蛋糕 >

 

依排經常整麵包俾少爺早餐 ,

係時候要轉下口味 , 唔係佢又會嘈嘈貢 !

 

好似好耐冇整過朱古力蛋糕 , 朱古力係我同少爺至愛 ,

左摷右摷食譜 , 覺得依個幾吸引 ,

最喜歡佢有朱古力醬 , 睇落好好味 , 就決定一試 !

果真冇令我失望 , 朱古力碎加香濃朱古力醬 ,

實在不能忍口 !

 

 

                                                                 



無花果川貝海底椰鱷魚肉湯 + 天然酵母香蔥煙肉卷

好似好耐冇入黎更新 ,

無它 , 一個字 " 懶 " !

中秋節過後 , 天氣變得更清涼乾燥 ,

適逄老闆從北京返港 , 早幾日就煲咗個靚湯一家人潤一潤 !

 

 

< 無花果川貝海底椰鱷魚肉湯 >

 

海底椰加鱷魚肉煲出黎嘅湯非常甜美 ,

加埋川貝 , 最啱依個秋冬季天氣飲用 ,

尤其氣管唔多好 , 咳嗽人士更加適宜多飲 !  

 

 

材料 :

陳皮 , 川貝 , 無花果 , 南北杏 , 非洲海底椰 , 乾鱷魚肉 , 瘦肉 ,

 

買海底椰請注意 , 記得使用正宗非洲海底椰 ,

( 圖下面白色一片片 , 就係正宗非洲海底椰 )

坊間有一隻小圓片貨色海底椰 , 此物並非真正海底椰 ,

當然價錢梗係比正宗廉價得多 ,

可惜一點藥用價值都冇 ,

既然供一家人飲用 , 就無為慳個少少嘞 ,

選購乾鱷魚肉較急凍好 ,

乾貨經過處理 , 無晒所有肥膏 ,

當然市面亦會有假貨 ,

最好幫襯相熟或大店舖購買 !

 

 

玩上天然酵母已經有好一段長時間 ,

對比番以往嘅照片 , 發覺自己比過往進步不少 ,

當然仍有大量改進空間 , 不過失敗率已大大降低 ,

間中我都會攞佢出黎練習一番 !

依個係昨天無聊嘅時候做嘅 , 第二次發酵中 !

 

 

< 天然酵母香蔥煙肉卷 >

 

剛出爐天酵麵包 , 忍唔住 , 一出爐馬上食兩個 , 滿足晒 ! 

清湯蘿蔔牛腩

不得不承認 ,

香港真係一片福地 ,

雖然地方細細 , 住屋環境唔算太寬敞 !

但係大天災橫禍永遠冇我哋份 ,

兩次超級颱風吹襲香港都能欣然避過 ,

確實感恩 !!

 

< 清湯蘿蔔牛腩 >

打風嘅日子 , 

少爺梗係冇得出街 , 晚餐理所當然在家享用 ,

佢第一時間要求煮牛腩 ,

咁啱 , 打風前夕我又買咗牛腩 ,

想食得清淡啲 , 唔想用太多醬料 ,

就做咗清湯蘿蔔腩 , 再用米粉拌食 ,

八號風球之下嘅晚餐就是這樣 !

蝦皮燕麥豆腐餅

 金魚搬入新竇已經一段時間 ,

眼見身邊blog友仔好努力將新家修飾得靚靚 ,

亦有blog仔想盡辦法將舊有搬入新家 ,

大家都相當勤力 , 反觀金魚懶根未除 ,

我嘅新家依然原地踏步 !

 

自從要從新開始之後 ,

不但對依個平台唔多習慣 , 就連寫網誌嘅動力都同時失去了 ,

暫時仲未有衝勁修飾新家 ,

只好暫且放下 , 睇下幾時除咗條懶根再慢慢研究 !

 

人係要學懂適當時候放手 , 冇嘢係唔可以放下嘅 ,

既然決定搬新家 , 從新開始 , 為免麻煩 , 節外生枝 ,

舊家所有 , 就由它隨雅虎一同俾埋葬好了 !  

 

 

< 蝦皮燕麥豆腐餅 >

 

潮流興健康飲食 , 

出外食飯 , 我會選擇放任自己 , 盡情地食 , 懶理健康與否 ,

不過在家煮食 , 我就會選擇較健康 ,

因為我仲未玩夠食夠 , 唔想咁快收工 !

 

蝦皮 , 好多人認為只可用作蒸蛋之用 ,

其實蝦皮本身帶有鹹香味 , 配合其它食材一樣可以有不少變化 ,

今次加入豆腐 , 燕麥 , 香蔥做咗豆腐餅 ,

既健康之餘 , 鹹鹹香嘅味道 , 又不會蓋過豆腐氣味 , 我覺得唔錯 !

 

明天就係中秋佳節 , 我預祝大家 ~~

 

中秋快樂  人月團圓

 

 

 

 

 

 

柚子醋海帶彩菜冷麵

 

 金魚真係蠢 , 依個平台對我黎講實在有啲複雜 ,

既無耐性 , 學識又淺薄 , 睇怕有排攪 !

唔理 , 開飯 ~~~

 

 

< 柚子醋海帶彩菜冷麵 >

全部美食展戰利品 , 彩菜麵加海帶相當爽口 ,

最欣賞依樽柚子醋 , 濃濃柚子味 , 我相當喜歡 !

 

搬竇第一炮 ~~ 醬油火箭筍







雅虎要結業 !!

 

無奈哋 !! 依篇成為搬竇新一頁試驗 ,

 

希望 Yahoo Blog 腦友們可以搵到我啦 !

 

仲有排要摸索新竇 , 俾啲時間我 ! 

 

 

 < 醬油火箭筍 >

 

同火箭筍偶遇 , 又要同雅虎分手 , 心情真係百感交雜